9.1.- Nas respostas dos Concellos existe mais información sobre a cobertura da televisión que sobre a cobertura da radio, o que pode explicarse por:

1.- A audiencia de RNE é inferior á de TVE, suscitando menos queixas

2.- As programacións de RNE 1 e RNE5 “TN”, dispoñibles en OM e FM teñen, lamentablemente, moitas zonas de sombra. RADIO CLÁSICA e RADIO 3, que soio se emiten en FM, aínda teñen menos cobertura.

3.- Na cobertura de RNE, sin rede de reemisores puntuais polas limitacións das frecuencias dispoñibles, a única posibilidade de actuación dos Concellos está nos acordos para emitir a programación de RNE polas frecuencias das emisoras municipais (VIVEIRO, por exemplo).

9.2.- Existe unha gran inquietude pola cobertura de televisión como servicio público, tanto a das canles de  xestión pública (TVE, TVG) como a das canles de xestión privada (ANTENA 3, TELE 5, CANAL +). Así o confirma a existencia dos diversos reemisores municipais para tódalas canles e as respostas dos concellos onde, ademais de informar sobre as deficiencias na cobertura das canles públicas que se solicitaba na enquisa, engaden, pola súa propia iniciativa, queixas sobre a cobertura das canles privadas, poñendo especial énfasis nos dereitos dos cidadáns a recibir as sinais de televisión e, obviamente, a recibíla con un mínimo de calidade. Como exemplo, poden verse as respostas dos concellos de CERVANTES, NAVIA DE SUARNA, AVIÓN, etc.

9.3.- A cobertura actual da televisión en Galicia é insuficiente. A existencia de zonas sin cobertura e a existencia de lugares onde non se pode ver a programación territorial de Galicia (algunhas reciben as sinais por Asturias), poñen de manifesto a necesidade de ampliar e mellorar as prestacións de RETEVISIÓN, entidade  responsable do funcionamento da rede de cobertura  para as canles de ámbito estatal (TVE1, TVE2, ANTENA 3, TELE 5 e CANAL +).

9.4.- En Galicia existen moitas interferencias de sinais foráneas, que non soio afectan ás zonas fronteirizas. As sinais das emisoras portuguesas, por exemplo, crean deficiencias directas nos concellos próximos á fronteira pero chegan (especialmente no verán) á zona de FISTERRA, potenciadas pola cadea de reemisores de RETEVISIÓN (DOMAIO, CABO DE FISTERRA, ...) 

9.5.- En Galicia preséntanse deficiencias na cobertura de TV por interferencias de sinais derivadas de innovacións ou melloras:

1.- Deficiencias acentuadas por novas instalacións como, por exemplo, as presentadas nos concellos de CAMARIÑAS e SAN SADURNIÑO como consecuencia dos parques eólicos

2.- Deficiencias acentuadas pola entrada en servicio das emisións de radiodifusión en sistema dixital como, por exemplo, as presentadas nos concellos de  SANTIAGO DE COMPOSTELA e TRABADA

3.- Deficiencias acentuadas pola instalación de novos reemisores, que melloran unhas sinais e perxudican outras como, por exemplo, as presentadas pola instalación do reemisor de TRABANCA SARDIÑEIRA no concello de VILAGARCÍA DE AROUSA, que mellora as sinais das televisións privadas e perxudica as de TVE

9.6.- As respostas dos Concellos poñen de manifesto a necesidade de colaboración das diversas Administracións (local, autonómica e estatal) para afrontálos problemas de cobertura, especialmente no control da calidade das sinais dispoñibles (que deben cumplir as condicións establecidas nos regulamentos técnicos e de prestación do servicio de difusión, aprobados polo goberno). Como exemplos desas demandas plantexadas polos Concellos podemos considerar:

1.- A solicitude de estudios técnicos, para determinar exactamente as deficiencias existentes no seu territorio, solicitada expresamente polos Concellos de FENE, TOQUES, POIO e VILABOA

2.- O arbitrio de solucións para problemas puntuais non resoltos por RETEVISIÓN como, por exemplo, os plantexados nos concellos de BERGONDO, BETANZOS, BRIÓN, NEDA, NEGREIRA, SAN SADURNIÑO, PEDRAFITA DO CEBREIRO, POIO, VALGA, VILABOA e VILAGARCÍA DE AROUSA

9.7.- A instalación de reemisores puntuais polos Concellos, para compleméntala insuficiente cobertura de RETEVISIÓN, crea posteriores obrigas económicas, para o mantemento e actualización dos equipos, que non sempre poden ser asumidas polos presupostos municipais, como manifestan varias respostas

9.8.- A existencia de dúas redes de cobertura, a das canles estatais (RETEVISIÓN) e a da TVG (RETEGAL), ante a necesidade de instalar micro-reemisores puntuais para algunha délas, plantexa a posibilidade de optimizalos recursos públicos evitando a duplicidade de instalacións con postes que poidan emitir simultáneamente as sinais da TVG e as da rede de RETEVISIÓN. Poden citarse, como exemplo, as respostas dos concellos de PEDRAFITA DO CEBREIRO, AVIÓN, BUEU e FORCAREI